Klimastreikrede vom 28. August
Liebi Klimastreikende
Mir stöi do wo i de letschte paar Johr immer wieder symbolträchtig öbis passiert isch: Vor 2 Johr der gross feministisch Streik, der 1. Mai, angeri Demos und genau vor 2 Monet isch do der Startschuss gfaue für dKampagne Ehe für alle. Was i jetz ufzöut ha, si soziali Alige wo mir aus offe dänkendi Frau sehr nöch stöi und i dorum au vehemänt ungerstütze. Es goht um Glichberechtigung, Sicherheit und Akzeptanz.
Hüt simer aber do für d’Klima-Aktion ufem Chrüzacherplatz: D’Klimaaktion, wo üs druf ane söu wise, dass es öbis vüu grösseres git aus au die soziale ufzöute Alige. Alige wo totau berächtigt si und üs aus Mönsche und soziali Wäse notürlech sehr beschäftige und mitrisse. Mit öbis grössers meini notürlech dKlimakrise – dKlimakrise wo jetz do isch. D’Klimakrise wo üs Problem wird mache wo mir zwar chöi errächne mit der Forschig und mathematische Modäll, aber s’Usmass wird vüu grösser si, aus mir aus Mönsche üs das chöi vorstöue.
Wenn mir dKonsequänze wo die Klimakrise mit sich bringt nid es bizeli chöi uffoh und jetzt nid verstöi, dass mir jetz müesse handle, wenn mir üs überhaupt in Zuekunft no wei mit angerne soziale Alige beschäftige, denn gsehni schwarz und es isch zspot. Jo, dKlimakrise wird oder duet scho soziali Ungrächtigkeit versterche, mir hei jetz scho Dürrine und schlächti Ärntine.
Mir heis chönne läse vor 3 Wuche im Bricht vom Wältklimarot, womer fasch mit de Ussage dervo si bombardiert worde. Das isch richtig so! Und es het üs überhaupt nid z’überrasche, wüu es isch jo nid der erscht sörig Bricht und überhaupt gits dKlimaforschig scho sit Johrzähnte und au so lang macht si ufe mönschgmacht Klimawandel ufmerksam. Der letscht sörig bricht, würdi mau säge het aber nid so vüu beachtig becho wie däjenig jetzt im August. Notürlech wüu 2 Wuche vorhär Unwätter über dSchwiz gfägt si wo wie sit Johrzähnte nüme, wo üs beeidruckt hei, wo üs hei loh gspüre womit mer müesse rächne mit dere Klimakrise.
Ig finges immerwieder beeidruckend wie der Mönsch uf Erfahrige reagiert. Aus Lehrerin isches mir das notürlech aber sehr bewusst. Aus Lehrperson gseht me wie die Erläbnis und Lernerfahrige oder Lernsituatione bi de Chinder hänge blibe, wo ebe mit säuber gmachte Erfahrige in Zämehang brocht wärde. Die Erläbnis blibe- das isch sicher öbis wo mir aui do mit üsne diverse Schuelkarrierene gmeinsam hei. Die so gmachte Lernerfahrige blibe viel präsenter und mir erinnere üs sicher aui no am Beschte a die Situatione womer öbis hei dörfe/müesse erfahre und erläbe.
Das isch in Bezug ufd Klimakrise sehr alarmierend und wichtig zwüsse, dass der Mönsch i Gäng chunnt wenner öbis erläbt und ar eigete Hut erfahrt.
Eigentlech heimers mitem Klimastreik und der Grüene Bewegig ebe nid so wit wöue loh cho aber do simer jetzt: Mir müesse jetzt handle. E Blick uf üse Läbensstil wärfe und luege: Was chani ändere, wele Bitrag chani in Soledurn zur Energiestadt leischte, wele Bitrag cha ig mit mim Ifluss erreiche in Soledurn, ir Schwiz, ir Wäut. Isch würklech mini ersti Priorität, chum chani wider flüge wäge Corona, no dMaledive zerläbe? Oder chani vilich mini Prioritäte jetz ändlech angersch setze, nachdämi mini Summerferie imene überfluetete Camping am Bielersee verbrocht ha?
Corona isch es guets Stichwort: Covid-19 het üs ufem fausche Fuess verwütscht und so vüu mit üs gmacht i de letschte 20 Monet- sozial, finanziell, politisch – auso wie au dKlimakrise wird mache: dPandemie isch ebe e Krise. Was do jetz aber plötzlech aues möglech isch gsi i dere Krise- Weli Ressource freigsetzt si worde um d’Bevölkerig zschütze isch erstunlech. Mir müesse jetzt aber unbedingt begrife, dass der Klimawandel genau au sone Krise isch, mir bruche auch Ressource um dBevölkerig zschütze vor de Konsequänze.
Durd Erwärmig vor Ärde erreiche mir jetz nodisno Pünkt womer nüm zrugg chöi. Mir müesse auso dermit umgoh, genauso wie mit em Virus.
Mir müesse jetzt aber merke, wenn der Meeresspiegu stigt, müesse mer au Milliarde i dHang näh wüu dUswürkige erläbbar wärde und der Mönsch bedrohe. Ebe wie mer dä Summer gseh hei- isch das jetz Realität: Mir müesse üs hüt und morn überlege womer üses eigerte Gäud investiere, womer der nöchst Gwünn vor Nationalbank nachhaltig isetzte, wiemer e Klimafonds uf dBei stöue – nid ob, sondern wie.
Imne Monet ischs möglich in Soledurn id Klimapolitik zinvestiere und Grüen und Rot zwähle – für mi ischs wichtig, dass mer au i üsere Chlistadt üse Ifluss uf die Krise usüebe. Hüt sezte mer scho es Zeiche- hüt streike mer für’s Klima.